SOLOPOS.COM - Panduan Informasi dan Inspirasi

Tragedi Sepur Kelinci

Ancase nyenengake atine bocah
karepe plesir murah meriah
limang ewu sepuluh ewu rupiah
wis kepenak tanpa sayah

Promosi Mitsubishi XForce: Stylish untuk Wanita, Praktis buat Ibu Muda

Pancen numpak sepur kelinci rada nggegirisi
sansaya gronjalan dalan sing nguwatiri
nanging sumringah lan gemuyune bocah
ngalahake rasa ajrih kang sumrambah

Ancase amrih enggal tekan panggonan
sepur kelinci tronjal-tronjol dalan padesan
nanging dumadakan sepur kelinci mogok
penumpang nyurung aba-aba bengok

Sepur kelinci ngglondor ing dalan mudhun
dioyak wis ora bisa ketututan
para penumpang nangis jejeritan
sepur kelinci jempalik ing tegalan

Getun tibane ing mburi
ditangisi wis ora bakal bali
kedadeyan kepungkur digawe pawulangan
satemene nyawa dudu barang dolanan
Andong, 11 Mei 2022

 

Ajrih

Manggon ing desa adoh saka ayem
saben wengi mripat angel merem
ati uwis kelangan rasa tentrem
wiwit tragedi klithih nulis crita surem

Sasi Syawal kudune beningake ati
nanging seling surup nuwuhake emosi
perguruan silat ameh tukaran
warta palsu sing dadi jalaran

Wayah surup srengenge minggir
wong sak motore enggal parkir
warung toko ditutup rapet
golek aman kemulan mblebet
Andong, 11 Mei 2022

 

Dudu Amarga Tanjakan Petrus

Ora pisan ora pindho
tanjakan petrus jaluk tumbal nyawa
enom tuwa dadi korban
umur ora dadi takeran

Pancen malaikat Izrail tansah awas
menthelengi raimu ping pitung puluh
nyambangimu ping selikur saben dina
ngelingake yen wis giliran ora bisa ditundha

Dudu amarga angkere tanjakan petrus
sing tekan saiki isih misterius
nanging urip mati pancen uwis digaris
marang Gusti Kang Maha Kuwasa
Andong, 17 Mei 2022

 

Wajibe Dadi Santri

Wajibe dadi santri kang badhe golek ilmu sejati
Kudu manut ngabekti marang Mbah Yai
Santri jaler setri mlampah tindak ngaji
ndekep kitab suci ing dhadha minangka tandha kemantepan ati
Banyu-banyu pancuran padha deres mili
Ancase mbasuh najis kang cementhel ing awak lan ati
Amrih siyap nampani agunging kalam ilahi
Kanthi ati kang bening kaya gelas kang kosong tanpa isi
Andong, 17 Mei 2022

Pegatan

Srengenge sing aslup ing gegere langit dadi seksi
kanthi nyebut asmane Gusti
wiwit saiki aku megat kowe sing biyen dakgondheli
lila legawa dakuculake tanpa dakgetuni
ciu lan omben-omben alkohol sapiturute bakal dakuwisi
cukup tekan seprene anggonku mbok apusi lan grogoti
jare gawe awak lan pikiran entheng sentiyeng
jebul namung nambah-nambahi nggliyeng
lan sing paling-paling medeni
meneng-meneng racun sumebar tanpa dakmangerteni
uwis sadar tenanan aku saiki
nganti salawase aku ora bakal bali
nyang omben-omben sing ora migunani
Andong, 12 Mei 2022

 

Salat Jumat

Endah senenge ati iki Kang Mas
nyawang jenengan siram resik ing dina Jumat
klambi koko, sarungan lan nyangking sajadah
mlampah gagah tumuju mesjid kanggo nglakoni ibadah
saestu, kula mboten ngarep-arep maneka werna Kang Mas
namung panjaluke kula jenengan kersa ajeg jumatan
amargi punika kawajiban ingkang dosa menawi dipuntinggal
Andong, 13 Mei 2022



 

Pari

Paringi kula waras Gusti
supados saged golek rejeki
winih pari sampun kula sebar
kula entosi kanthi sabar

Paringi subur Gusti Pangeran
dhumateng sakabehing tanduran
adoh saka tikus lan sedaya hama
kang gawe para petani pituna

Sembah nuwun Gusti
kangge ijo pari kang nengsemake ati
insyallah ikhtiar sampun kula tindakake
uga tawakal mboten kula lalekake
muga-muga kanikmatan saking Gusti Pangeran
tansah dadi kawigaten kula salawase
Andong, 17 Mei 2022

Endang S. Sulistiya. Pandhemen sastra Jawa manggon ing Dukuh Poncol, Pulutan, Nogosari, Boyolali. Lulusan FISIP UNS ingkang remem nulis sastra Jawa lan Indonesia.

Cek Berita dan Artikel yang lain di Google News
Simak berbagai berita pilihan dan terkini dari Solopos.com di Saluran WhatsApp dengan klik Soloposcom dan Grup Telegram "Solopos.com Berita Terkini" Klik link ini.
Solopos Stories
Honda Motor Jateng
Honda Motor Jateng
Rekomendasi
Berita Lainnya